2023年10月21日，香島華德福學校在香港南昌站上蓋V Walk商場戲院包場放映兩套紀錄片，均是由馬來西亞導演、演員李心潔監製、執導的《我的名字是李心潔》、《山頂小屋》。後者是關於位於馬來西亞吉隆玻的Hilltop House Child Development Centre華德福幼稚園，在片中探討孩子與家長在華德福教育裏的成長。
電影放映過後，我們邀請了四位現就讀香島華德福學校的學生，分享他們從三間不同的幼稚園、一直就讀華德福學校的經歷。分享會由獨立記者羅惠儀主持，並設有與在場100多名觀眾的問答環節。我們有嘗試拍攝、錄音，但不幸因技術問題全軍覆沒，現時只有文字記錄。為傳達各分享者的神韻，我們提供粵語口語文字版及書面語版。
引言
主持：大家好，多謝今天大家來到由香島華德福學校特別包場、給家長觀賞兩部由李心潔執導、監製的《孩子，你好嗎？》系列其中兩套紀錄片：《我的名字叫李心潔》、以及有關華德福教育的《山頂小屋》… 不好意思，我真的有點緊張。（掌聲）我想知道，在座各位有誰並不是讀華德福學校的主流學校家長？可否舉手看看？（約1/3觀眾舉手）也不少啊。
容我先自我介紹。我是獨立記者羅惠儀，一直專注於本地教育和教養相關的採訪。在香港，華德福教育一直被視為是另類教育，家長和記者對其會存在許多迷思。這麼多年來，從幼稚園、小學到現在的中學，陸續開始有眾多學生從華德福學校畢業。究竟這種教育在本地的發展會是怎樣？我也非常期待。香島華德福學校就是這些學校之一，我目睹了它從幼稚園、小學發展到今年即將迎來的首屆八年級畢業生，今天座中有其中三位。待會如若在場的家長、特別是那些子女在主流學校就讀的家長，對華德福有任何疑慮或疑問，這四位學生都已做足準備，可以解答各位的問題。
不妨讓這四位同學先作自我介紹。由男孩子開始，好嗎？
Oscar：我是馮焯楠，八年級中的最年長學生。
Chloe：My name is Chloe。我叫Chloe，也是就讀八年級。
Halima：我的名字是Halima Chan，我在八年級就讀。
Jing：我叫靖靖，是這裡唯一的七年級學生。
主持：我特別提醒學生用廣東話發言，他們都會努力達到這一要求。實際上，他們的廣東話非常流利。
唱歌
主持：採訪華德福學校時，我會進入他們的課堂中。我發現無論在幼稚園或中學，學生都經常唱歌。在非音樂課堂、普通的術科課堂中，也有歌唱元素，我認為這非常有趣。不知為何華德福學校如此注重歌唱？Chloe和靖靖可否解釋一下？
靖：這首歌是飯前的祝福歌。許多人可能都熟悉。
Hands together, hands apart. Hands together we are ready to start. Hold hands. Hold hands. Blessings on the meal.
主持：Chloe，能否解釋這首歌的意義？
Chloe：這首歌在幼稚園時，飯前常唱。但每間幼稚園的習慣都有所不同，不同的老師會教不同的歌。
主持：那麼中學呢？是否也有這樣的習慣？
Chloe：每年我們都會更換飯前的祝福歌。
主持：對，我也覺得中學生在吃飯時會唱歌是一個有趣的現象。Oscar，作為男生，你喜不喜歡這樣做？
Oscar：其實經歷了這麼多年，這已成為一種習慣，增添了一種儀式感。
主持：確實，華德福教育很重視儀式感。在唱歌的過程裏，相信同學都學到不同的東西。你們會不會也更加喜歡唱歌？
靖：也不算超級喜歡、無時無刻都唱，但有時想傻一下，便會唱歌來放鬆心情。
華德福 vs 主流幼稚園
主持：華德福幼稚園和主流幼稚園有何不同？我知道Oscar在入讀華德福幼稚園之前，曾經入讀主流學校，時間不長。你可以分享一下僅有的記憶嗎？
Oscar：在主流學校，我只記得每天都有功課。
主持：你當時多少歲？
Oscar：當時大概四歲。我記得每天都有功課。
主持：你喜歡那樣的學習模式嗎？
Oscar：我不太喜歡抄寫。由於每天都有這樣的功課，我覺得很煩厭。我只想玩。
主持：哪讀了多久，媽媽就幫你轉去讀華德福幼稚園？
Oscar：一年半後我便轉到Root Children去了。
主持：華德福幼稚園有何不同？
Oscar：在華德福學校，我多了很多時間可以去玩，還有與大自然交流的機會。
主持：在大自然裏學習不同的東西？
Oscar：對，沒錯，因為我幼稚園在山旁邊，經常會到山腳下的一個農田裏玩。
主持：華德福教育確實非常重視自由遊玩。我還記得你曾經告訴我，你「只是負責玩」，但實際上還是有學習的成分。你還記得從中學到了什麼嗎？
Oscar：因為每天都在玩耍，每天都處於放鬆的狀態，因此我學到了如何放鬆自己。現在我們讀八年級，有學業的壓力，有時都需要放鬆一下，就會需要知道如何放鬆，來應對這種壓力。
主持：我記得Oscar強調他在自由遊玩中如何學會放鬆。我在想，現代的孩子是否懂得如何放鬆呢？Oscar很強調這一點。能否分享一下，作為一名中學生，懂得如何放鬆，對你來說有多重要呢？
Oscar：對我來說，放鬆是一種釋放壓力的方式。如果每時每刻都在做功課，很不好受的。但如果休息片刻、睡一睡，再繼續學習，效果可能會更好。
主持：我記得你提到做木工。在華德福教育中，從幼稚園開始，學生就會接觸到不同的木工手藝。男孩子特別喜歡這個嗎？女孩子也喜歡嗎？
靖：我不喜歡。
主持：但你有做過嗎？
靖：老師要我做，我便會做啦。
Oscar：他們不喜歡的原因，可能是我們的木工老師要求…
主持：要求高嗎？
Oscar：是的，要求較高。
主持：但你都能做到，而且喜歡這種勞動性的工作？
Oscar：我自己還可以。我不能代表我班的其他同學。
主持：你做過什麼木工項目？你小時候的第一件木工作品是什麼？
Oscar：我小時候在家幫助我媽媽製作花箱。現在還在家外面。
主持：對孩子來說，學習木工重要嗎？
Oscar：這是一種很有用的技能，可以為家裡添置不少傢俱。（眾人笑）
主持：我看到Oscar的媽媽也在這裡。事實上Oscar在家裡也做過很多木工項目。很多家裡的物件都是你參與製作的嗎？
Oscar：我製作過一張椅子。
主持：哪女孩們呢？有做過這些嗎？（兩名女生搖頭，Chloe點頭）
學數學
主持：一直以來，我在採訪華德福學校時，發現他們的數學教學方式很有趣，不僅包含唱歌，例如乘數表的歌，還會透過一些實體活動來呈現某些數學概念。這與主流的教學模式顯然很不同。我想請問，從小到大、在華德福的數學課堂中，有哪些特別的教具或方法？我們之前看到一些照片，好像是數字卡片、或者有一個板子上面繫著繩子來畫圖案。能請Chloe分享一下你們是如何學習數學的嗎？
Chloe：剛剛您提到的那塊板和繩子，其實是用來學乘數表的。上面有12口釘子，每隔多少釘、就代表是該數字的乘數表。
主持：即是那些圖形能夠鞏固你的記憶，讓你明白數字倍數的原理嗎？
Chloe：是的，類似這樣的工具。
主持：這樣的方式確實很深刻。我看到他們從小學到大，都有很多圖形製作的活動，相當豐富。我記得你也提到學習分數的時候，有一個很有趣的方式呢。
Chloe：四年級時我們開始學習分數。通常老師會給我們一些食物，然後讓我們切成若干部分，用這種方式來教導我們分數的概念，又學又食。
主持：靖，我聽說華德福學校沒有教科書，但每位學生都有名為「main lesson book」的主課本，能分享一下那是什麼嗎？
靖：我們確實沒有使用教科書。如果我們在課堂中需要學習某種計算方式，老師會教導我們一種方法，然後要求我們透過圖畫來表達，寫在主課本裏。
主持：這真的是一種有趣的方式。我記得每次看華德福學生的數學主課本時，會看到很多有趣的故事，例如五加十，老師可能會以故事形式來說明，也會把故事繪畫出來，對嗎？
靖：你可以說都是用故事。例如，我們在初學四則運算時，每一個運算都是以一個精靈來呈現，每個精靈都有他特殊的技能。
主持：你還保存那些課本嗎？
靖：我應該還有，但不太確定放在哪裡。
主持：這亦是華德福教育的特色。在主流家長眼中，他們可能會覺得，「怎麼沒有教科書的？」但若仔細觀察每一年級、甚至每一科的主課本，每位學生都會根據每個主題，投入大量心力去創作、完成。相較於傳統的教科書，內容或字數似乎較少，但實際上，學生在每個步驟裏學到的知識，我認為並不會少了。
學習 = 快樂的終結？
主持：四位同學都有跟我分享過，他們在華德福學校裏長大的快樂學習經歷。但主流家長的看法是，華德福學生在七歲之前不寫字、也不讀書，似乎學習得太輕鬆。這是否意味著他們學得較少？你們有跟我分享，到四年級時，好像是「快樂的終結」。為何描述四年級為終結呢？大部分的主流家長的觀察是一年級就已是「快樂的終結」，甚至從幼稚園開始。你們到四年級這麼晚才「終結」已經算是很幸福。不如由你們自己現身說法。是不是很遲才開始學習，到四年班才有大量學術內容？會不會難以掌握？Oscar，你先說。
Oscar：四年級可以說是快樂的終結，或者是壓力的開始，因為從四年級開始有家庭作業。因為從一到三年級，一般不會怎麼有作業，老師會在課堂上完成所有作業，所以學生回家後可以自由玩耍，因此我們有更多時間去適應作業的概念。
主持：華德福學校的功課是怎樣的？
Oscar：功課一般是課堂上未完成的部分，帶回家中完成。
主持：真的有功課嗎？
Oscar：是有的。我們現在八年級正在進行一些projects，所以主班老師不會給我們太多作業。但平常可以有一堆功課。
Chloe：事實上，四年級不一定是「快樂的終結」。這也取決於老師。我們以前的老師不會給作業。到了五年級時，可能一個月會有一到兩次的功課。但到了六年級時換了老師，基本上每天都有功課。
主持：功課其實有用嗎？
Chloe：如果在課堂上沒做完，回家做功課是可以的。
主持：需要溫習嗎？
Chloe：現在，每完成一個學習模塊後，我們都會有一個測驗。例如上週五，我們有數學測驗，所以需要溫習。或者有時會有默書，也需要溫習。
Halima：其實在三年級時我已經有功課，對我而言沒有太大的差異，因為是逐漸、慢慢地加上去的，並不真的困難。因為在早期他們主要希望我們能多接觸大自然，例如多去hiking等活動。
主持：但華德福教育制度中的孩子在七歲之前不學寫字，到了七歲才開始學習寫字，這會不會造成困難？還記得嗎？
Halima：不會的，因為我們會使用彩色的block crayons來學寫字母，這樣就會更加exciting，用不同的彩虹顏色慢慢來圍着繪畫。
靖：我當時的老師會使用大自然的元素來教學，例如「M」會被解釋成是山的形狀。我認為這樣的教學方法更能造成深刻的印象，我覺得這是非常有效的。
主持：四年級是否「快樂的終結」？
靖：我不覺得是終結。可能會像你說開始有更多的功課和高深的學習，但因為我自己也在成長，我覺得到了時候，我也有點覺得「我不想只是玩耍，我想學習了！」
主持：這種態度實際上是很好的。在華德福學校中，孩子的好奇心和學習能力一直都被重視，不會受到打擊。從小學開始，他們會基於自己的興趣和進度進行學習，老師會給他們時間去掌握，這不意味著他們無法達到標準。
主流 vs 華德福學生
我知道幾位當中有朋友或親戚在主流學校讀書，而你們在華德福學校，算是一種另類的體系，可以分享一下你們對他們的觀察嗎？我知道Halima和靖都可以分享。
Halima：我有些表親在local schools讀書，他們對academics態度很serious。從一年級開始就有很多抄寫和功課，似乎少了些玩樂的時間。不僅僅是少了遊戲，也似乎承受著很大的pressure，以及過多的information，不能完全receive。
主持：然而，您有沒有觀察到，相比之下，你在學習的成果，無論是語言掌握還是數學，與那些主流學校的親戚進行初步比較，內心有沒有覺得自己學得較少？
Halima：也不會。實際上，我們的學習也是按着年齡增長變化，給我們的information是剛好的… 我不肯定可以怎解釋。
主持：阿靖，請談談你的朋友。您是否也有主流的同學和朋友？
靖：我對主流學生有一個觀察。他們經常留在家，戴眼鏡，有很明顯的黑眼圈，還有皮膚是雪白的。
主持：為何你會這樣描述他們？是因為他們不常出門接觸大自然，所以較為白皙嗎？
靖：我認為是的，他們經常只是待在家中做功課，不會與陽光接觸，因此皮膚看起來比較雪白。
升學
主持：我們接下來的最後一個問題。明年有三位同學即將畢業，將正式進入主流學校繼續他們的學業。Oscar、Halima和Chloe，作為首批畢業生，你們如何看待自己的升學之路？即將回到主流學校，你們擔心適應嗎？或者有哪些科目是因為您在華德福學校的學習經歷而對其產生興趣，令你希望繼續學習呢？
Oscar：關於升學這個問題，我個人並不太擔心，我媽媽最近有移民的計劃，雖然不知道會有什麼結果，但我相信媽媽會處理好的，如果不成功的話，應該會轉去國際學校。
Chloe：其實對於轉校我是沒有所謂的。
主持人：也就是說，你們是有考慮過自己將來需要面對公開考試，對此你們有沒有擔心呢？即使是在國際學校，也算是主流教育，會與華德福學校很不同嗎？有沒有想像過在國際學校如何學習呢？
Chloe：沒有想像過。
Halima：我現在會思考，如果轉去international school，我會怎麼樣呢？朋友們會怎麼樣呢？學習的內容會不會更難呢？他們可能會更多地使用computers，這一點可能會讓我擔心，因為華德福學校是不使用digital設備的。
Oscar：我有兩個朋友轉到了RCHK讀書。其中一個幾乎每個星期五都會來我們班級visit，向我們介紹國際學校的教育方式，並fill us in on international體系。他們學校是ESF（按：英基學校協會）的一個學校，叫作RCHK，應該在馬鞍山那邊。他們學校傾向更多地使用電腦來解決教學上的問題，比如佈置作業？哦，通過email給你；上課？用PowerPoint。會有更多這些digital device的使用。而我們華德福現在不是不使用，而是用得少一些。
問答環節
主持：我們時間有限，進入問答環節。不知道在座的各位有沒有問題，想向四位學生提問呢？讓他們分享一下華德福學校有什麼特別之處，或者解答一些主流教育的家長們的疑問。主流的家長們為什麼會對非主流的華德福教育感興趣呢？
學生怎看華德福？
觀眾一：如果要談問題呢，我反而是對家長有疑問呢。（眾人笑）我自己的孩子已經算是高年級了。我反而想問你們：我很欣賞你們的勇敢，願意站出來接受採訪，是什麼給了你們這麼大的動力？因為青春期其實是很自我的，你們是什麼動力讓你們願意這麼大膽地站出來面對我們？
Oscar：校監捉我們出來的啊！（眾人笑）
觀眾一：如果你不出來，你認為會怎樣？如果你們不肯的話，最後還是可以退縮的嘛，那為什麼到最後你們都沒有選擇退縮呢？是校監讓你們感到很大壓力嗎？
Oscar：No. I just don’t have the power to resist. （眾人笑）
主持：其實你們都很願意去分享自己在華德福學校讀書的經驗，對家長、對這方面有興趣想了解更多的人而言，學生的親自講解會更好一些。
校監：或者我不如也問個問題吧？假設時光退回10年，如果你有個朋友的媽媽在考慮她的小孩是否應該讀華德福學校？現在的你會對這位阿姨說些什麼呢？
靖：讀啦！（眾人笑）
校監：為什麼？
靖：十年前我第一個想法就是「哇，我有個朋友來和我玩，那肯定很好啊！」但同時也就是，我常常看到我所有不在華德福學校的朋友都好像不太開心，總是很累的樣子。所以我覺得，如果能夠一起讀華德福便好了……我現在回想，如果以前有人這樣問我，我就會答：「你去讀吧」，因為我現在看到更多的結果：我在和非華德福學校的朋友之間，總是時常跳來跳去的那個，朋友就比較「（扁嘴、頹廢聲）噢～」。（眾人笑）
主持：會否推薦其他家長去讀這類型的學校呢？
Halima：我認為如果更多人去華德福學校是好的。在那裡可以接觸更多nature，玩得更多，有更多的imagination，還可以和朋友一起玩，你真的可以有朋友－－有些學校讀書讀到忘記了人是有得玩、有朋友。然後你所做的事情全部都太學術化了，失去了這些東西。所以， ya, people should go to Waldorf schools. （眾人笑）
Chloe：說實話，在華德福學校，你可能會思考到與其他人不同的東西，你會更快樂一些－－老師會讓你思考，而不會馬上給你答案，也不會說你是錯的。你有更多發言的自由、思考的自由，不用擔心別人說你錯了。在長大後你就可以想到和其他人不同的東西，可能有更好的解決方案。
華德福的愉快回憶
主持：在座的其他人還有其他問題嗎？
觀眾二：我想問你們這幾年裡最開心的事是什麼呢？
Oscar：我喜歡露營之類的。學校每年都會安排一兩個這樣的活動，這樣就可以在大自然中更好地與朋友們connect。
Chloe：你所指的這幾年，從我們小學開始到現在，還是由幾年班開始計算呢？
觀眾二：從一年級開始吧。
Chloe：從三年級起我們就有露營了，第一次camping、farming之類的都很好玩，然後最開心的是五年級的Olympic Games。因為可以和其他學校的學生一起玩。
課後活動
觀眾三：我想問一下，放學後你們通常會和朋友做什麼？
靖：他們幾個會去吃麥當勞。（眾人笑）
主持：我想家長們會想了解的是，你們放學後通常會做什麼活動呢？
Halima：其實放學後就是回家，然後做些功課，然後可能看看書，聽聽音樂，然後吃飯、洗澡，之後就睡覺了。
主持：有沒有其他的事情呢？你們需不需要像其他同學一樣，學琴棋書畫樣樣都要學，有沒有參加其他課外活動？
靖：我有參加課外活動。但這並不是家人逼迫，而是我自己都想參加的。我學小提琴、學日文、學校提供的一個烹飪班，還參加了一個樂團。
主持：也就是說，這些都是非學術的，一些課外活動。那麼快畢業的同學，需要補習嗎？
Oscar（搖頭、揮手）： Non-existent.
主持：你們班上的同學都沒有補習嗎？
Oscar：I would assume so.
Halima：確實沒有。
主持：真的是大家都以自己的休閒活動為主，也有溫習，但不會去上補習班之類的。
Oscar：連補習班是什麼我都不知道。
展望未來
觀眾四：想聽聽四位，現在大概是14歲左右吧？
Oscar：12到14歲。
觀眾四：是的，那想看看四位現在的看法，如果長大後要面對社會，或者有沒有想過將來想做什麼？
主持：這位家長的孩子是不是讀華德福教育的？
觀眾四：我不是華德福的家長，但是孩子算是接受另類教育。所以想聽聽四位對此的看法？即是與一般主流教育出來的14歲孩子相比，他們是如何思考自己的未來？
主持：是到了什麼年齡？我也想知道。
Oscar：未來是多遠的未來？（眾人笑）
主持：大學？或者想從事什麼職業？有沒有特別的升學和職業的方向，此刻有沒有思考？
Oscar：我個人想在完成中學之後，先去遊歷一下這個世界，積累更多的經驗再去讀大學。
Chloe：其實我不太考慮過，但是如果現在要做決定的話，可能將來會寫書，成為一名作家。
Oscar：她現在正在寫一本書。
Halima：其實我也沒有很深入地思考過，但是我想成為我自己公司的CEO（觀眾喝彩），但是具體是關於什麼，我還在瞭解中。
靖：我也沒有特別的想法，因為我不太擔心我以後會怎樣，我覺得，我想進的學校，我就能進去，我覺得我不會失敗到哪去。（眾人笑）
主持：哪來的信心呢？為什麼你們覺得自己的能力不會差到哪裡呢？標準如何衡量？
靖：舉例來說，在我的樂團其實不只有華德福學校的學生，還有很多主流學校的學生。我們的知識和所學的東西其實沒有多大的區別，甚至可能比他們更好，所以我覺得沒有什麼問題，不會有考不到學校的問題。
華德福的態度
主持：這是家長的最後一個問題了。
觀眾五：我想問問四位同學，華德福教育是否在追求知識方面對你們有所幫助？比如說讀了華德福學校讓你們對追求知識有更大的渴望，無論是學術知識還是其他方面的知識？
Oscar：可能會比傳統教育更渴望追求，因為華德福教育不會逼迫你追求知識，而是會激發你的興趣去追求知識。
主持：實際上我之前和他們交談時，其中一個問題是，你們將來是否有興趣讀什麼，或者對哪些學科感興趣？華德福小學的教育每年都有不同的人文主題，有很多不同的歷史和神話故事，課程內容非常清晰。同學們都有自己的取態，例如非常喜歡羅馬的知識，或者古埃及，他們對這些有特別的喜好。相比可能一些主流教學的小學生，甚至初中生，他們對這方面的喜好是否有這麼清晰的表達？我們相對少聽到。不如你們分享一下上次你和我談到的，你特別喜歡某些歷史的原因？我覺得可以讓其他家長也知道一下，其實在小學你已經在涉獵這些學科了。
靖：我自己最喜歡希臘神話，因為希臘神話實際上涉及的事件，可以說是和現實世界有關的事情，比如建築等等。可能我已經知道這些事情，聽起來就覺得很有趣。就是比較有趣的事情。就像學一座建築物一樣，原來背後有一個故事。
主持：也就是說你有興趣去探究那些歷史建築物，背後的意義是什麼。同學們還有其他的分享嗎？
Halima：其實我也很喜歡Greece，因為他們的故事有點dramatic。很有趣，聽起來就有圖畫在我的腦海中浮現。
觀眾五：剛才在紀錄片中提到，華德福教育的目標是希望孩子們將來不會用戰爭解決問題。然而，你也知道，現在世界上存在著許多衝突，我想問問在華德福教育中，你們學到了哪些價值觀，覺得對自己有幫助呢？
靖：對我來說，我學到了對待他人更友善的態度，不必一來就是罵的。也就是說，你可以和他們溝通，而不是說：「你好蠢呀！」（眾人笑）
Halima：在華德福教育中，我們可能更注重creativity和imagination。
Oscar：不會一言不合就動手打人，而是會尋找solution，讓雙方都happy一些。
主持：也就是協作精神對吧？
Chloe：可以往其他人可能沒有想到的方向想像。不一定要和所有人做同一件事，可以做自己想做的事情。
主持：這正是華德福教育以兒童為本的教學精神。非常感謝今天四位的分享，也感謝各位觀眾來觀看這套電影。教育方式要配合每位家長、每個家庭的情況，還有孩子的需要和興趣。希望大家在這兩部紀錄片中，可以找到自己的方向來培養自己的孩子。謝謝大家。
引言
主持：大家好，好多謝今日大家嚟到由香島華德福學校特別包場、畀各位家長睇嘅兩部由李心潔執導、監製嘅《孩子，你好嗎？》系列其中兩套嘅紀錄片：《我的名字叫李心潔》、同埋有關華德福教育嘅 《山頂小屋》… 唔好意思，我都係有啲緊張。（掌聲）我想知呢， 在座各位有幾多唔係讀華德福學校嘅主流學校嘅家長喺度㗎？可唔可以舉個手睇吓？（約1/3觀眾舉手）都多喎。
我都介紹吓自己先啦。我係獨立記者羅惠儀，一直以嚟我都係採訪關於本地嘅教育、教養範疇嘅記者嚟嘅。華德福教育，對香港嚟講，一直都係被視為另類教育嘅一種，對家長、就算係對於採訪嘅記者嚟講，當中會有好多唔同嘅迷思。咁多年以嚟，由幼稚園、小學、去到而家都陸續有中學嘅讀華德福嘅學校嘅學生畢業，究竟呢個教育喺本地嚟講嘅發展會係點樣呢？我都好期待嘅。而香島華德福學校係其中一間，我見住佢地由幼稚園、小學、到而家吓年將會有首屆畢業生，八年級嘅同學就會畢業。在座有三位喺度，所以一陣間如果在座家長，特別讀主流學校嘅家長，有啲關於華德福嘅疑問，其實四位同學，我都覺得佢哋係好有預備，可以回答各位嘅問題。
不如由四位同學先介紹吓你自己先啦，好唔好呀？由男孩子開始。
Oscar：咁我就係馮焯楠，八年級嘅最大嗰個學生。
主持：唔使緊張，都係介紹吓自己嘅啫。
Chloe：My name is Chloe.
主持：其實呢，華德福德學校，佢哋都好國際學校喎。
Chloe：我個名叫Chloe，跟住又係八年班個囉。
Halima：我個名係Halima Chan，我係喺八年級。
Jing：我個名係靖靖，我係呢度唯一一個七年級嘅人嚟嘅。
主持：我都有特別叫同學要用廣東話去發言，咁佢哋都係會好盡力做到呢一點。其實佢地廣東話係非常之流利嘅。
唱歌
主持：去華德福學校採訪，其實一直以嚟，身為記者最深刻嘅地方，係你入到去華德福嘅班房，無論幼稚園又好，甚至去到中學都好，其實佢哋好多歌唱嘅唔知點解。你係非音樂堂、而喺普通術科嘅堂裏面，其實都有歌呢樣嘢。我覺得咦，好得意喎。咁不如就由同學去介紹返究竟點解華德福要唱咁多歌㗎呢？去到中學都唱㗎喎。你會唔會都可以介紹吓，點解要唱歌呢樣嘢？不如由Chloe同埋靖靖。有聽過靖靖同Chloe – 之前我地有見過面，有唱歌嘅咁，會唔會都可以簡單表演吓？中學生都唱歌，對於採訪主流教育嘅記者嚟講，去到一個中學生班房，而唔係音樂堂，都好多歌唱，唔知點解喎咁？係喇，你哋有唱過其中一首，可唔可以都表演吓咁樣。（靖與Chloe小聲討論）簡單唱吓啦。其實點解要有呢首歌、同埋呢首歌係咩環境底吓咁樣唱嘅呢？
靖：呢首歌係通常食飯前唱。你哋可能有啲人會認得嘅。
Hands together, hands apart. Hands together we are ready to start. Hold hands. Hold hands. Blessings on the meal.
不如Chloe介紹下呢首歌其實係點解呢？同埋點解去到中學都有咁多歌唱嘅呢？
Chloe：頭先嗰首歌呢，就係幼稚園嗰陣時食飯之前會唱嘅。但係每間幼稚園都唔同。每個老師都會叫你唱唔同嘅歌。
主持：但係中學呢？係咪返學嗰陣時候都會做呢樣嘢？
Chloe：我哋會可能一年左右會轉首食飯歌。
主持：冇錯，就係點解中學生食飯都要唱歌，都係我其中一個都覺得「咦，好有趣」嘅一個地方嚟。咁Oscar，男仔鍾唔鍾意做呢樣嘢其實？
Oscar：其實經歷咗咁多年，已經變成咗一個習慣嚟，增加咗一個儀式感啦。
主持：冇錯，華德福教育裏面其實都好重視儀式感。其實喺唱歌過程裏面，我諗都大家同學都學咗好多唔同嘅嘢，會唔會都增加咗你自己彼此嘅一種、即係突然之間有時候都會有啲歌都好鍾意唱吓咁樣？
靖：唔會話勁鍾意、幾時都想唱，但可能想傻吓咪會唱歌囉。
華德福 vs 主流幼稚園
主持：其實喺華德福幼稚園同主流幼稚園有咩唔同呢？我知Oscar其實喺讀華德福幼稚園之前，其實你都讀過其他主流嘅學校嘅，都好短嘅時間啦。可唔可以都分享吓啲僅有嘅記憶係點樣㗎？
Oscar：喺主流學校裏面，我僅有嘅記憶，就係每日都會有功課。
主持：你幾多歲？
Oscar：嗰陣時候大概。。。（媽：四歲前）啊，我4歲。 咁就（問媽）係咪每日都有功課㗎？係每日都有功課嘅。
主持：你覺得你自己鍾唔鍾意呢其實。
Oscar：唔係好鍾意抄字囉，因為每日都有呢種抄字嘅功課。就會覺得好煩嘅，同埋成日都想玩咁囉。
主持：咁讀到幾耐度，媽媽同你轉咗去讀華德福德幼稚園？
Oscar：我讀咗一年半就轉咗去Root Children嗰度喇。
主持：咁有咩特別唔同呀？你自己嗰陣時候，就算好細個，僅有記憶裏面，有咩唔同喺度？
Oscar：就多咗好多玩嘅時間，同埋同自然交流嘅一個機會。
主持：有機會喺大自然中學習唔同嘅嘢？
Oscar：係，冇錯，因為我嗰個喺一個山旁邊，就成日都會去山腳下面嘅一個農田玩嘅。
主持：華德福教育都好注重free play呢樣嘢。我記得你有同我講過喎，即係淨係負責玩嘅，但其實都有學到啲嘢㗎，你記唔記得你學到啲乜嘢㗎？
Oscar：因為每日都喺度玩呢個情況裏面呢，就每日都會好放鬆，就會學到點樣去放鬆呢樣嘢。因為我哋而家8年班啦，就會好多功課嘅，嗰啲咩壓力呀、亂七八糟嗰啲嘢，咁呀certain times都要放鬆一吓，咁就會發揮呢個要放鬆嘅知識。
主持：好記得Oscar好強調佢細個從free play呢個過程之中，佢真係學識放鬆。我諗而家世代嘅細路係咪好識得做呢一樣嘢呢？但係好強調佢識做呢樣嘢喎。可唔可以都分享吓，你已經去到中學生，識放鬆對於你面對壓力，有咩咁重要嘅呢樣嘢？
Oscar：識放鬆，對於我面對壓力呢樣嘢，係一種由壓力裏面去釋放出嚟嘅一個通道啦。即係你每時每刻都有做緊功課嘅，咁你都好唔好受啫，但係如果係瞌一瞌之後再做功課嘅話，咁就可能會考得高啲呀，咁樣囉。
主持：我記得你都有講過話你記得做木工呢樣嘢，因為華德福教育裏邊，其實由幼稚園開始，佢哋都會接觸好多唔同木工嘅手作。你係咪男仔特別好鍾意做呢一樣嘢呢？你女仔都中意㗎係咪？
靖：我唔鍾意。
主持：但係你都會做係咪？
靖：叫我做咪做囉。
Oscar：佢地唔鍾意嘅原因係因為我哋嘅木工老師就有少少。。。
主持：要求高？
Oscar：係，要求高。
主持：但係你都達標、都鍾意做呢種勞動嘅嘢。
Oscar：我本人就OK啦。I cannot speak for the rest of my class.
主持：咁你做過啲咩木工？好細個第一件木工做過啲乜嘢？
Oscar：好細個嘅時候，我就應該喺屋企幫我媽去揼嗰啲花箱。（問媽）唔係咩？而家出面都仲有嘅。
主持：呢個對於小朋友嚟講係咪好重要呢？識做木工？
Oscar：係一種要掌握、必要嘅一個技能啦，因為可以為屋企添置不少嘅傢俱。（眾人笑）
主持：Oscar媽媽都喺度喎，其實Oscar都做咗唔少木工喺屋企。真係好多屋企嘅嘢都係你有份做㗎係咪？
Oscar：造咗張櫈。
主持：OK。女仔就有冇做過呢樣嘢？（兩女生搖頭、Chloe點頭）
學數學
主持：一直以嚟呢，都有一樣，我覺得喺採訪華德福嘅時候都幾得意嘅一樣，喺數學嘅過程裏面，佢哋除咗唱歌，即係可能都有乘數表嘅歌呀，或者喺一啲活動去表達一種數字嘅formula，我真係覺得，咦，都係同主流係非常之唔同嘅學習模式。咁不如我都想請吓同學講吓，由細到大喺華德福嘅堂裏面學數學，嗰種用嘅教具又好，或者係個方式嘅，有啲乜嘢特別嘅地方？可唔可以分享下。頭先可能都見到啲相啦，我諗觀眾都見到有一啲字卡，或者係佢做咗個板、佢會有啲繩好似圈住咁去做啲圖案。不如都由Chloe分享吓，其實係點樣學數學㗎你哋？
Chloe：你頭先講嗰個板，跟住有啲繩喺度繑，就係乘數表嚟嘅。佢好似有12個釘，隔幾多個就係幾多嘅乘數表。
主持：仲有啲圖形出嚟，會鞏固你個記憶，知道數字嘅倍數係點樣？
Chloe：係，類似咁樣嘅嘢。
主持：會唔會令你好深刻呢。其實呢樣嘢真係都會知道嗰個數字嘅原理、倍數係點樣嘅，嗰啲圖形。因為我見到佢哋由細到大，學圖形嘅手作，其實係好豐富嘅，即係我諗外人唔會喺一、兩堂觀堂明白佢哋做咩。但係我記得華德福嘅小朋友係大量做呢類型嘅圖案㗎喎。除咗呢樣之外，我都記得你講學分數都好得意嘅一樣嘢嚟㗎喎。
Chloe：四年班嗰時就學分數啦。咁就睇吓個老師嘅。平時就會有啲嘢食，跟住就叫我哋切成幾多分，跟住就咁樣教分數，咁用分數、跟住又有嘢食咁樣樣。
主持：即係你喺四年班開始係學分數嘅？嗯。阿靖呢？其實我都知喺華德福裏面嘅都有一個好特別嘅，冇教科書喺華德福嘅班房裏邊，但係所有嘅關於佢哋學嘅語言、或者係數理，其實都會有一本叫做main lesson book喎。你可唔可以都介紹吓，其實呢樣係啲咩嘢嚟㗎。
靖：我哋係冇textbook呢樣嘢嘅。但係如果我哋做例如上堂要計數，可能個老師會教我哋一個方法計，咁我哋就要 — 因為想你明白個方法 — 就會叫我哋要用圖畫表達返，就係喺個main lesson book度寫出嚟。
主持：所以係好得意嘅一樣嘢。我記得次次睇佢哋學生嘅關於數學嘅main lesson book，好得意喎，佢哋就係會前面有好多故仔㗎，係咪呀？即係可能五加十，可能都會自己有個故事去present個故仔出嚟，而佢哋就之前就畫個故仔出嚟㗎，係咪呀？
靖：我諗你都可以話係故仔嘅。即係好似我哋好初頭學加減乘除，每一個都係精靈嚟嘅，佢哋就識做啲唔同嘢。
主持：你而家仲有冇keep起嗰啲課本？
靖：應該有嘅，但係我唔係好知喺邊。
主持：呢個都係華德福嘅一個特色嚟。如果喺主流家長嘅眼中覺得，咦，冇教科書喺度㗎喎？但係你如果細心睇佢哋每一個年級、甚至每一個科目嘅一啲main lesson book，其實無論佢哋嘅美術啦、或者係佢哋嘅創作喺裏邊嘅呢，其實每個同學都要好就住每一個主題，都會花好多心思去做佢哋嘅呢本簿。係咪真係學唔到嘢呢？對比textbooks咁，可能無論內容或者字數，好似好少咁樣，但係其實對於小朋友嚟講嘅，佢哋每一個步驟或者係學嘅嘢嘅，其實喺嗰本簿裏邊，我唔覺得係比較會少咗囉。
學習 = 快樂的終結？
主持：我知道四位同學都有同我分享過，由細到大喺華德福讀書讀得好開心。但係主流家長都會覺得，咦，華德福啲細路7歲前係唔寫字，亦都唔會讀書，好似好輕鬆咁樣去讀、去學習。其實會唔會真係會有一種比落去嘅感覺？其實會唔會學少咗嘢？因為你哋好似都有同我分享過，到到四年班，就係一個「快樂嘅終結」嚟㗎喎。我唔知點解會形容四年班係個終結呢？其實好多主流家長可能講一年班已經係一個快樂嘅終結，甚至係踏入幼稚園K1開始都可以話係快樂嘅終結。但係你哋四年班係好幸福囉，咁遲。不如由你地同學現身說法，可唔可以講吓呢一樣嘢呀？就係係咪我學遲咗嘅，去到四年班先至開始有大量學術嘅呢？定係會唔會好難掌握？或者係點睇四年班呢一個中折嘅地方呢？Oscar先？
Oscar：四年班可以講係一個快樂嘅終結，或者可以講係一個壓力嘅開始，因為四年班係開始會畀家庭作業呢樣嘢嘅。因為Class 1 to 3，一到三年班應該係唔會點畀作業啦，然之後老師會安排你喺課堂上面全部搞掂呀，然之後返到屋企就會有得玩。所以就係會比較多時間去接受呢個功課嘅概念。
主持：功課係啲乜嘢，喺華德福嘅學校裏面？
Oscar：功課係比較係一個喺課堂上面做唔完咩？咁咪返屋企做啦。
主持：真係有功課嘅？
Oscar：係有嘅，由於我哋而家呢啲八年班喺度做緊啲project，我哋個主班老師唔會畀太多功課我哋。但係平時呢，係成堆咁畀你。
Chloe：其實呢，四年班唔一定係「快樂嘅終結」。其實係睇個老師嘅。之前呢，我哋個老師就係唔會畀功課。去到五年班嗰時，可能一個月有一兩份咁樣嘅啫，但係去到六年班就轉咗個老師，就差唔多日日有功課。
主持：功課好唔好呢其實？
Chloe：如果課堂學唔完嘅話，有功課係都OK嘅。
主持：需唔需要溫書㗎？
Chloe：我地而家就每個block完咗之後就有一個test咁樣。好似上個星期五、琴日呢，我哋有個math test，咁就有溫書囉。或者可能有dictation就會溫書。
Halima：其實我係三年班就開始有功課嘅，其實又唔係真係好大分別啦對我嚟講，即係會慢慢畀你少少少少，再加上去咁樣囉。又唔會好難嘅，因為再之前佢哋真係想你接觸多啲大自然囉，係會比較多啲hiking呀，呢啲囉。
主持：但係華德福細路七歲前唔寫字，去到真係七歲前先開始寫字，會唔會好難掌握㗎？有冇印象？
Halima：唔會嘅，因為佢會用嗰啲block crayons啦，即係用啲顏色寫啲alphabets出嚟嘅，咁呢就好似即係more exciting囉，用唔同嘅顏色慢慢surround佢with第二啲彩虹顏色。
靖：我嗰時學就係個老師會攞唔同大自然嘅嘢，即係例如佢話M呢就係一個山嚟，因為山形狀係咁樣㗎嘛，我覺得咁樣學會搞到覺得深刻好多囉，所以我覺得有用好多。
主持：四年班係咪一個快樂嘅終結？
靖：都唔係終結嘅，我會話。即係可能開始 — 好似你頭先話齋 — 開始多啲功課呀，可能學啲嘢深啲呀，但係因為你自己都長緊㗎嘛，咁我覺得會好似。。。你去到嗰個時間，你都會已經有少少「我唔係淨係想玩囉，我想學嘢喇」咁樣。
主持：呢個態度其實係好好嘅，因為喺華德福嘅學校裏邊嘅，其實本身小朋友嘅好奇心、或者係對於學習能力嘅掌握，其實冇一下子被打擊。即係佢哋係由細到大開始，都係佢哋興趣、或者係好自主學習類，鍾意學嘅嘢、配嘅程度、去到邊度，佢哋會慢慢咁樣去自己掌握，同埋容許佢哋可以慢慢去學習，咁唔代表唔達標㗎喎。
主流 vs 華德福學生
主持：我知道你哋當中係有一啲朋友仔、或者係親戚，其實都係喺主流學校裏面讀書嘅，而你哋就喺華德福啦，即係被形容為係一個另類嘅學習嘅體系裏面成長。可唔可以都分享吓你哋去觀察、你見到你嘅朋友仔或者親戚嘅，其實係同你哋學習有啲咩唔同呢？我知道Halima同埋阿靖都可以分享呢樣嘢嘅。
Halima：我啲表姐係去嗰啲local schools嘅。佢哋就好serious㗎啦，對佢哋嘅academics，since一年班就一路好多寫嘅、好多功課呀，就少啲。。。即係冇得玩呀，咁又唔係淨係玩嘅，但係就好似太多pressure，同埋嗰啲information太多，唔會receive得曬囉。
主持：但你有冇一個觀察，覺得你自己係學得比佢哋少嘅呢？其實即係無論語文嘅掌握呀、數理呀，好初步咁樣同啲主流學校嘅親朋戚友睇，你自己心入面有冇一個比較喺度㗎？
Halima：又冇嘅，其實去到差唔多嘅age就會學唔同嘅嘢囉，即係會啱啱好嗰個information。。。I don’t know。
主持：阿靖，你都講吓你啲朋友啊。你都有一啲主流嘅同學仔呀、朋友仔，係咪呀？
靖：我覺得我自己有一個對主流學生嘅觀察，就係佢哋成日都係、即係永遠都唔出街㗎啦，戴眼鏡㗎啦，有好多黑眼圈，同埋白雪雪嘅囉。
主持：點解你會咁形容佢地？唔去大自然咁就白啲？
靖：我諗係囉，即係佢哋成日都淨係留喺屋企入面做功課，咁唔會同太陽接觸㗎嘛，咪白雪雪囉。
升學
主持：我哋最後一條問題喇。咁就有三位同學下年已經開始畢業㗎喇，即係都會正式去返主流嘅學校嗰度，去繼續佢哋升學。Oscar、Halima同埋Chloe都可以分享吓嘅呢一刻，你哋係首屆嘅畢業生，會點樣睇自己個升學嘅路㗎？即係就嚟去返主流，會唔會擔心唔適應？或者係有啲咩科目就係正正因為你喺華德福讀書嘅，令到你有興趣，你會繼續讀呢樣嘢？
Oscar：關於升學呢個問題，我本人就唔係好擔心啦，但係就由於我阿媽近期就有啲移民嘅打算，唔知佢搞成點啦。 ，反正我阿媽係會幫我搞掂嘅，如果唔成功嘅話，應該會入international（schools）。
Chloe：其實呢，如果轉校嘅話，我冇乜所謂嘅。
主持：即係都有諗過自己將來呢都面對公開試呢樣嘢喎，有冇擔心呀？或者係覺得就算係國際學校，都係主流教育喎，其實都同你哋好唔同㗎喎？有冇想像過喺國際學校點讀書呢？。
Chloe：其實冇諗過。
Halima：咁我呢就而家會開始自己諗，如果我轉去International School，我會點呢？啲朋友會點呀？做嘅嘢會唔會難啲咁呢？佢哋就會用多啲computers啦，可能嗰樣嘢我會擔心，因為我哋華德福就唔會用digital嘅嘢。
Oscar：我就有2個朋友呢就轉左去RCHK讀啦。佢哋其中有一個就差唔多每個星期五都會嚟我哋班visit一吓我哋啦，同埋fill us in on international嘅教育方式啦，同時都會幫助我哋理解個international system。然之後呢就會發現佢哋嗰個學校啦，就係ESF嘅一個學校，叫RCHK，就應該喺馬鞍山果邊？佢哋嗰個學校呢，就會用比較多嘅computer去解決呢個教學上面嘅一啲問題，即係咩俾功課呀？哦，email俾你囉；教嘢呀？PowerPoint囉。會比較多嘅呢啲digital device嘅嘢。因為我哋華德福而家唔係唔用，係用少啲。
學生怎看華德福？
主持：我地時間有限，都去到問答環節。我唔知在座各位會唔會有問題，想問4位學生？由佢哋分享返究竟讀華德福嘅學校係有啲乜嘢特別嘅地方， 即係可能解答吓啲主流教育嘅家長，其實有冇一啲疑問，好想問吓四位學生？有冇疑問？咁點解主流嘅家長會有興趣嚟了解非主流嘅華德福教育？
觀眾一：如果要講疑問呢，我反而係對家長有疑問囉。（眾人笑）我自己啲小朋友都真係咁上吓大啦。我反而想問你哋、即係我好欣賞你嘅行出嚟喺度接受訪問，咁我想問有乜嘢令到你咁大動力？因為青春期其實都真係好自己嘅，你咩動力令到你哋咁願意咁大膽咁行出嚟望住我哋？
Oscar：校監捉我地出嚟㗎嘛！（眾人笑）
觀眾一：如果你唔出嚟，你認為會會點？如果你哋唔肯行出嚟，其實雖然話係捉啫，最後都可以縮㗎嘛，咁但係點解到最後你都冇選擇去縮呢？定係校監令到你覺得好大壓力？
Oscar：No, I just don’t have the power to resist.（眾人笑）
主持：其實你哋都好願意去分享返自己喺華德福讀書嘅經驗，畀任何嘅家長、有興趣想知多啲呢方面嘅資料呢，都覺得你哋現身說法係會比較好啲呢。即席咁去分享返自己嘅個人讀書經驗，俾家長認識返華德福係啲乜嘢，其實你哋都願意㗎，係咪呀？
校監：或者我不如都問一個問題吖？如果你而家有個朋友，倒退返10年，你有個好朋友個媽媽喺度諗緊，我個小朋友好唔好讀華德福學校？而家嘅你會同呢個auntie講啲咩呀？
靖：讀啦！（眾人笑）
校監：點解？
靖：因為我覺得，如果我要諗我10年前，我第一個諗法就係「吓，我有個朋友嚟同我玩，咁梗係好啦！」但係亦都就係，我成日見到我全部唔係華德福學校嘅朋友都好似好唔開心囉，成日都好似。或者好攰囉幾時都？咁我咪覺得，如果可以一齊，唔係喎。。。咁我咪覺得如果我而家諗以前有人咁樣，我就會覺得「你讀啦」，因為好多我依家睇到呢啲結果出咗嚟，我喺同我啲唔係華德福嘅朋友中間，係成日跳嚟跳去，果個跟住嚟就「（扁嘴）ohhhh」嗰啲嚟嘅。（眾人笑）
主持：會唔會？推介畀其他家長去讀呢類型嘅學校呢？
Halima：咁即係我覺得如果多啲人去華德福係好嘅。即係接觸多啲nature呀，玩多啲，多啲imagination，同埋可以同朋友玩囉，你真係可以有朋友囉，有啲學校係你讀到書唔記得咗有得玩、有朋友。跟住你做嘅嘢全部都太academic，冇咗呢樣嘢囉。所以。。。ya, people should go to Waldorf schools.（眾人笑）
Chloe：因為呢，講真，你喺華德福學校，你可能會可能諗到唔同其他人唔同嘅嘢，因為你細個嗰陣時你都冇咁多。。。你會開心啲呀，跟住啲老師會叫你諗吓，即係佢唔會就咁畀你啲答案，又唔會話你係錯嘅。咁你就多啲freedom to speak、freedom to think，唔會驚人哋話你錯曬呀，咁你大嗰陣時就可以諗到同其他人唔同嘅嘢，可能better solutions。
華德福的愉快回憶
主持：在座仲有冇其他問題？
觀眾二：我想問你哋呢幾年裏面最開心嘅事係咩事啊？
Oscar：就會鍾意嗰啲營囉，camping嗰啲啦。學校會每年都會安排一兩個嗰啲咩活動呀、camping呀嗰啲，就會可以喺大自然裏面better connect with your friends。
Chloe：其實呢幾年，由依家八年班，至到幾多歲、係幾多年班，係呢幾年？
觀眾二：由你小學開始啦。
Chloe：即係由一年班？咁三年班嗰陣時呢，我哋就有camping，第一次camping呀、farming呀、果啲都好好玩，同埋最開心就係五年班時Olympic Games啦。因為可以同其他學校一齊玩。
課後活動
觀眾三：我想問吓呢，你哋放咗學之後通常會做啲咩㗎同朋友？
靖：佢哋幾個會去食麥當勞。（眾人笑）
主持：我諗家長會想了解嘅，係你會做啲咩活動㗎其實？
Halima：其實放學都係返屋企，跟住做埋啲功課，跟住就可能睇吓啲書呀，聽吓音樂呀，跟住就食飯、沖涼，之後就瞓覺。
主持：有冇過其他嘢㗎呢，你哋需唔需要好似其他同學咁樣嘅，要學琴棋書畫樣樣嘢，其他課外活動有冇做？
靖：我有學課外活動嘅。但係唔係屋企人逼，係我全部都想嘅。小提琴、日文、學校有提供一個烹飪班、同埋有參加樂團。
主持：即係全部都係啲非學術嘅，一啲課外活動嚟嘅。咁嚟畢業嘅同學，需唔需要真係補吓習嘅呢？其實有冇呢樣嘢㗎？
Oscar（搖頭、揮手）：Non-existent.
主持：你哋同班嘅同學都冇呢樣嘢㗎係咪呀？
Oscar：I would assume so.
Halima：都冇啊。
主持：真係全部都都係自己做一啲好消閑嘅活動為主，溫書都有嘅都，但係就唔會係去補習嗰類嘅同學囉咁，仲有冇咩特別嘅問題？
Oscar：我連補習班係咩我都唔知喎。
展望未來
觀眾四：想聽吓四位呢，而家係咪14歲左右？
Oscar：12到14。
觀眾四：係啦，咁想睇吓四位點樣睇自己嚟緊，如果成年之後要面對社會啦，或者有冇諗過將來會想做啲咩？
主持：呢位家長係咪讀華德福嘅？
觀眾四：我唔係華德福嘅家長，但係小朋友都算係讀另類教育。所以想聽吓四位又會點樣睇？即係同一般主流教育出嚟嘅14歲嘅小朋友，係點樣諗自己嘅將來？
主持：係到幾多歲？我都想知喎。
Oscar：將來係幾將來嘅將來？（眾人笑）
主持：大學？或者想做啲咩職業？咁係咪類似呢類啦。有冇咩特別嘅升學同埋職業嘅路向，呢一刻都有諗囉？
Oscar：我本人就想上完中學之後就，遊歷吓呢個世界啦，賺多啲經驗先出去讀大學咁囉。
Chloe：其實呢我唔咪好諗過嘅，但係如果要依家決定嘅話可能、將來可能寫書囉，做作者咁囉。
Oscar：佢依家都喺度寫緊一本書。
Halima：我其實我又唔係真係諗得好deeply㗎啦，但係我想做一個CEO of my own company囉（眾喝采），但係係關於咩嘢呢，我仲了解緊。
靖：我都係冇乜諗嘅，因為我唔係好擔心我遲啲會點，即係我覺得，我想入嘅學校，我入到嘅，即係我覺得我唔會可以衰到去邊嘅。（眾人笑）
主持：哪來嘅信心呢？覺得自己嘅能力，點解唔會衰得去邊個程度呢？Standard點樣衡量？
靖：因為例如我樂團，其實係唔係華德福，即係好多主流學校人嘅。我咩知識呀、嗰啲嘢其實冇乜分別㗎囉，甚至可能好過佢哋都唔定嘅，所以其實我覺得冇乜問題，會咩入唔到學校定係咩。
華德福的態度
主持：家長最後一條問題啦。
觀眾五：我想問下四位同學仔，華德福教育有冇令到你地對於追求知識方面，去幫到手呢？譬如話讀咗華德福，令到我渴望去追求知識，無論academic又好、或者任何方面嘅知識？
Oscar：可能應該會比傳統嗰啲要追求得多啲嘢，因為就唔會逼你去追求知識啦，而係會去提起你呢個興趣去追求知識。
主持：其實我之前同過佢哋傾偈，其中一樣嘢呢，我都有問佢哋將來會唔會想讀啲咩啊，或者係咩學科有興趣呢？其實華德福小學嘅教育啦，每年都有唔同一啲人文嘅科目，有好多唔同嘅歷史、神話故事，個課程內容係好清晰㗎。咁同學呢都有佢嘅取態喺度，例如係好鍾意羅馬嘅知識，或者係古埃及，佢哋係有佢哋嘅特別喜好。對比起可能一啲主流教學嘅小學同學，甚至初中嚟講，係有冇咁清晰嘅表達佢對呢方面嘅喜好呢？我地相對少聽。不如你哋都分享吓上次你同我講過話，好鍾意某一啲歷史嘅，係咩原因？我覺得可以畀其他家長都知吓你哋、其實喺小學你已經係涉獵緊呢一啲方面學科。
靖：我自己最鍾意希臘神話，因為希臘神話其實係有某啲事件，可以話係連駁到依家真係有嘅嘢，例如建築嗰啲。可能我已經知道嗰樣嘢，聽落我就覺得好有趣。即係好玩啲囉我覺得成件事。即係學一棟樓，原來後面有個故事。
主持：即係有興趣去探究吓面前嘅歷史建築物，其實背後嘅意義係啲乜嘢。同學仲有冇都可以分享比其他家長知道？
Halima：其實我都係好鍾意Greece㗎啦，其實因為佢哋嗰啲故事有少少dramatic嘅。好玩囉，其實聽住真係會有好多圖畫喺你個頭入邊。
觀眾五：頭先喺紀錄片入邊呢，就係華德福教育係希望啲小朋友，將來最後係唔會用戰爭去解決啲問題。咁你知道而家都世界好多衝突，我想問幾位喺華德福嘅教育入邊，你學到啲咩價值觀，你覺得係好幫到你哋自己？
靖：有一個幫到我自己就係對人好啲囉，即係唔使成日都係一嚟就鬧呀嗰啲？ 即係，你係可以同佢傾㗎啦，你唔使咩：「你好蠢呀！」（眾人笑）
Halima：華德福入面，我哋會可能多啲creativity同埋imagination囉，係比較多啲。
Oscar：就唔會一言不合，然之後揼低你個頭呀，咁嗰啲囉，但係就會去搵一個solution，就雙方都happy一啲嘅。
主持：協作精神囉？
Chloe：可以諗吓啲其他人可能冇諗過方向。即係唔一定要同全部人一齊做同一樣嘢嘅，你做自己想做嘅嘢都得啦。
主持：呢個就係華德福以兒童為本嘅一個教學精神喺度囉。咁好多謝今日四位嘅分享啦，多謝各位今日嚟睇呢套戲。教育嘅嘢，只有最適合各位家長屋企嘅配套，同埋自己小朋友嘅能力同埋興趣嘅教育。希望大家喺套紀錄片裏面，兩套嘅，都可以得到自己嘅方向去教養自己嘅小朋友啦。多謝各位。